|
طير المواسم ..
http://www.arb-up.com/files/arb-up-2008-1/NXx38412.gif
[align=center]المقدمة : انني اؤمن بكلمات التشجيع التي يتلقاها الناشئ في مطلع حياته ممن يثق بهم ويعتز برايهم ، فيمضي الي وجهته على يقين من النجاح .. وأؤمن بالظروف وفعلها في تمهيد اسباب النجاح وتيسير البدء في طريقه ، ثم المثابرة عليه الي غاياته القريبة والبعيدة .. وأؤمن بالرغبة في الوجهه التي يتجه اليها الناشئ والعمل الذي يختاره ويحس من نفسه القدرة عليه والاستعداد له مع الاجتهاد والتذرع بالوسيلة الناجعة .. اؤمن بهذه المعطيات مجتمعات ولا اؤمن بها متفرقات ، اؤمن بالتشجيع والظروف والرغبة تتلاقى معاً وتتوافق في الخطوات الاولى ، ولا اؤمن بها متفرقة يتيسر بعضها ويتعذر سائرها في مستهل الطريق .. هذا مع كامل مودتي واحترامي .. سوار ،،، [/align] |
اهداء ..
اهداء :-
الي امي .. الي أبي .. الي اخواني .. الي أحبابي وأهلي في منتديات دنقلا الاصالة والتاريخ والكرم .. الي عشاق الحرف ... الي من سبقوني في دوزنة الكلمة .. الي البسطاء الذين لازالوا يمشون بفطرتهم الاولى .. اليكم هذه المحاولات التي ظلت حبيسة الاضابير سنين ، فهي في حقيقتها صورة لخريطة وجدان .. كنت وما زلت أراها محاولات قاصرة ، لم تنضج تجربتها الفنية . ولعل تمسكي بها يعود الي انها تصوير مرحلة من العمر تكثفت فيها التجارب ، وان اتسم معظمها بالسلبية وخلفت آثار باقية حفرتها يد الايام على جدران الذاكرة .. وهي محاولات للتعبير عن المشاعر والرؤى والافكار والقيم في مرحلة من مراحل الحياة توشحت بالرماد .. معذرة فالحكم لكم أحبتي .. هذا مع كامل مودتي واحترامي .. سوار ،،، http://www.arb-up.com/files/arb-up-2008-1/jJi38793.jpg |
طير المواسم ،،
طير المواسم .. احكيلي يا طير المواسم عن بلادي والنخيل .. أحكيلي عن اهلي وميلادي .. وعن النيل .. وغناوي الليل .. عن البيت السقاني الحب والرحمة عن الفرحة والاطفال وإخواني .. ( بثينة ) ضراها جمل الشيل ( وامونة ) الكلاما عديل .. ( ونور الدين ) نورو يضوي مليون ميل .. وللمحتاج يعبي يكيل .. ( ونجم الدين ) نجم ساطع في عز الليل وعن الزول النبيل وأصيل .. ( ده تاج السر ) علم ودليل .. ومعروف ( عادل ) المبروك .. يعدل للصغير وكبير .. وساعة الحارة ما بيميل .. وماسك الدفة ماشي عديل .. وعن الولد القليبو لهيب .. ( سيف الدين ) يصد السيل .. مسولت فوق ضهور الخيل .. وكلمني يا طير .. عن ( محاسن ) تعشي الضيف .. تموت عشان تخدم اخوانا ولا بتكل ولا بتمل .. ( وبدر الدين ) بدر ضواي رزين وتقيل وحدثني يا طير .. عن ( رفاعي ) فتى الخلوة .. حفيد الشيخ وابوهو الشيخ ختام المسك والترتيل .. واحكيلي يا طير المواسم .. عن الحلة والدافوري والتمرين وعن بنوت تهز الريح خصيلاتن تعانق الليل وعن بلدي .. وتراب بلدي وريحة الطين .. ونوم العافية للتايهين وعن الظرافة .. والبساطة .. العروسات والدلاليك .. المقصات والشبابيل .. المساير والتساريح .. العراريق والجلاليب والمناديل .. واحكي لي يا طير المواسم عن السواقي والبوابير الدناكي والمواسير .. المصارف والسياييل .. السرابات .. والبراود والفدادين المناجل .. والمحاريت التقاوي والشواويل .. الفزوعات .. الصفافير الكواريك الغنيوات والتهاليل القواسيب .. القساسيب المخازن والمطامير والمحاصيل وفوتني يا طير المواسم وشيلو شوقي .. شوق عاشق بحب النيل يحن يوماتي للبرسيم وللتاويل وللبلد الزهور وبدور .. بلاد الطلة والقندول .. وفوتني يا طير المواسم .. وشيلو شوقي .. وامشي وزعو .. ( للعبابدة ) و ( للدناقلة ) و ( الحسيناب ) و ( الخياييل ) .. وما تنسى يا طير المواسم ( الوصية ) .. و ( الهدية ) .. و ( تغريدة الحب الأصيل ) .. سوار في يناير 2000م السعودية – جدة |
حبك في القلب ابدي ..
حبك في القلب أبدي .. يا مسافر.. عليك بالشوق الشايلو معاك أحكيهو مقاطع لي ( أمي ) سلام ووئام وتحية معطرة فل وانسام مليانة حنان .. ممزوجة أريج وعبير ريحان قول ليها ( وليدك ) .. جافاهو النوم .. جواهو حنين ومعاك سهران .. يا مسافر .. عليك بالأمل الشايلو معاك سميهو أماني .. أشواق ومعاني .. وارميهو بذور في حضن ( أمي ) وقول ليها ( وليدك ) مستني رضاك .. ومتمني لقاك .. اديهو رضاك .. يا مسافر .. عليك بالحب الشايلو معاك غنيهو ( خلود ) عشان فرح ( أمي ) وبي صوت مسموع لي كل الناس .. وريهم كيف ؟؟ بعزف أوتار عشان فرح ( أمي ) يا أعظم أم .. صورتك في الخيال تسري يا ارحم أم .. شوفتك في الظلام نوري يا أجمل أم ... حبك في القلب ابدي يا الساكنة دوام عروق دمي الطاردة دوام جيوش همي الضحكة التسقي يباس زمني يا أجمل أم .. ( حبك في القلب ابدي ) سوار ،،، نوفمبر 2000 السعودية - جده |
داير اسمعك ..
داير أسمعك .. داير اسمعك .. بس حرام تديني طلة وأفقدك .. وتعبر خواطري بحور عينيك وأفقدك .. وأطوي المسافات التطول .. قصدي الوصول لي سكتك .. ألقاك وين ..؟؟ وسط الدعاشات والنسايم .. وفي الجروف الماخدة من لون طرحتك .. ولا في دمع الغلابة .. باين عليك في سرحتك .. داير اسمعك .. ما كت مفكر لحظة في يوم افقدك .. واصبر .. اقاوم في الحنين .. وجع المنافي وهيبتك .. وأنا عندي إيه ؟؟ غير ضحكتك .. ضواية بالفرح البشع من مهجتك .. ماليني احساسي القريب لي صحبتك .. وياريتني ما ضليت مشيك وخطوتك .. يا ريتني ما أتغربت يوم .. مشتاق اجمع في بقايا ذكرتك .. لو شفتي كيف ؟؟ عذبني سفري .. لحظة وداعك ودمعتك .. وعذبني لما أتذكرك .. وأذكر عبيرك والرزاز .. فايح يشكل روعتك .. وينك إنتي .. ؟؟ وين نفورك .. ؟؟ وين عنادك .. وبسمتك ؟؟ ووين محطات زمني فيك .. ؟؟ يا ربي بقدر اوصلك .. !!!!!!!! سوار في ابريل 2000م السعودية – جده |
زمن التداعي ..
زمن المحنة .. ياما هويتك .. واستنيتك وياما تعبت عشان القاك .. وياما رسمت سواد عينيك .. وكم ساهرت اعيد ذكراك في زحمة الشارع .. تحت الشمس والحر .. ويا قمره يا ظلمة .... والقاك نتلما .. في الحلة عصرية .. وحبوبتي متكية في راكوبة منسية حجوة وفرايحية وذكرانا وردية والقاك نتلما .. نلعب مع الشفع .. ( شدا .. ودسيسية ) وأناديلك ... هو لب . لب كم في الخط تجاوبيني .. بهجة واريحية وأناديلك ... هو لب . لب كم في الخط .. عويناتك بسيماتك وضحكة طفلة فضية .. وتبقى الدنيا آخر ليل .. يقوموا يتفرقوا الشفع .. وانا وانتي نتهامس ..امسك طرف إيديك .. للبيت اوديكي .. ونتباكا نتوادع وباكر امل لقياك .. والقاكي بدرية .. وتاني نجدد اللعبة .. وفات ... فات .. وفي ايديهو شال أمنيات .. والضحكة وقعت في البير .. وصاحبنا .. واحد مسكين .. فتر من قسوة الأيام .. وكم اتجرع الأحزان .. يصارع وأملو في الأوهام .. وفي ذاكرتو صورة إنسان .. وقصة ريد خرافية .. وفات .. فات .. يفوت زمن المحنة معاك .. زمن ايامو ذهبية .. سوار في يونيو 2001م ك . صنقعت |
الصورة ..
لحظة بكاي بذكرك .. لحظة بكاي بذكرك والشوق يفيض من عيني .. دمعات ذي بحور .. مبهولة في أرض التعب بذكرك وميلاد حكايتنا البدت رحلة وتبادل بالورق .. والصورة ديك كان السبب .. وإمتد مشوار التعب .. تعباً جميلاً مستحب .. *** بذكرك .. رحلة ومسافات تبتعد إصرار وجد .. هجران وصد .. مجنون أغالب فيها تيارات هواك يرميني موجك دمعة في الشاطئ النضب ! وين المنابع والمصب ؟؟!! وكيف أبتدت ؟؟!!!! كل البعرفو .. الصورة ديك كان السبب وإمتد مشوار التعب .. تعباً جميلاً مستحب *** بذكرك .. والحكايات تدهش محطات العمر والانتظار زمني الصعب وآلامي من طول الدرب ... احزان محلقة فاردة جنحات السحب *** لحظة بكاي بذكرك .. أحلام مدونة في غلافات الكتب سيرة قلب .. على باب مغاراتك وقف !!! بي كل أدب .. وأتخيلك ... تقابة صوفية ولهب اسطورة زنجية وقبب ربابة شايقية وعجب ساقية نوبية وقرب كرري وكبوشية ولبب وكل العرب ..وإخوانا في يوم الاحد .. *** بذكرك .. والشوق يفيض ماليهو حد وين المنابع والمصب ؟؟؟ وكيف ابتدت ؟؟!! كل البعرفو .. الصورة ديك كان السبب وإمتد مشوار التعب .. تعباً جميلاً مستحب .. سوار في مارس 2002م ك .. صنقعت |
حبيبنا سوار
هنا سـأخيم كثيراً سـأنسكب بين الحرف و الكلمة،، واندلق مابين السطور،، فـحرفك أنت بجاذبيته يجبرني على الحضور لأنه بإختصار باذخٌ ولا يُمل.. لـِ قلبكـَ |
تسلم يا حبيبنا وليد الشوق على الحضور الدائم والمرور الذي كم أفرحني ..
لك محبتي بقدر جمالك .. |
صديقنا وأخونا وحبيبنا ..وعريسنا سوار لك التحية...!!!
صديقنا وأخونا وحبيبنا .. وزميلنا الوجيه العريس سوار.. ومزيداً من الابداع.. يامرهف الاحساس يافنان.. ولك التحية..ولكم التحية..!! ( رسـمـتـك يـاحـزن رسـمـة ) رسـمت الـحزن مـع الـهم رسمـت الـدمع والأوهـام رسـمـتـك يـاحــزن رسـمـه عـلـيهـا كـامـل الا لـوان رسـمـتـك ياحـزن رسـمـه مـاهي رسـمه ورد وخـزام رسـمـتـك يـاحـزن رسـمـه عـليـهـا كـامـل احـزانـي بــرسـمـه تـحكــي آلامـي بـرسـمـه تـحكـي الاآلام بــرسـمـه حـبرهـا دمــعـي تـهلـل كـنهـا امـزانـي بــرسـمـه دـمـعـهـا بـاقـي مــدام لـلـحزن اعـوام يــمـرالـعـام تـلـو الـعـام ويـجدد جـرحي الــثاني سـؤال اكـرره دايـم متـى يــرجـع هـذاك الـعـام ؟ متـى تـزورني البـسمـه متـى توادعنـي اشـجانـي يـقـولـون الـفـرح بـاقـي ويعـزف اروع الانغـام وانـا اقـول الـحـزن بـاقـي وزلـزل كـل اركـاني الا يــافــرحـه ايـامـي الا يـافـرحـه الاحــلام عبــاره كـنـت ارددها وصـارت وقتـهـا فـاني رسـمتـك يـاحـزن رسمه عليها بصمه الابهـام عـلـيها بصـمي ورسمـي وتوقعـي وعـنوانـي |
| الساعة الآن 05:15 AM. |
